'SENTIMENT' WYS ROCK SE SAGTER KANT MET HUL DEBUUT

Verskaf / Fotograaf: August Photography

’n Nuwe naam kom na vore in die Afrikaanse rocktoneel met groot drome, groot kore en selfs groter emosie. SENTIMENT se eerste enkelsnit, "Ek Wil Jou Sien", is uiteindelik beskikbaar. Die groep is die spanpoging van Jako Meyer op sang en Regardt Scheepers op kitaar, met ’n gereelde groep sessiemusikante wat hulle ondersteun.

Hoewel die groep nuut is, beskik albei musikante reeds oor ervaring in die plaaslike musiekbedryf. Jako is bekend vir sy voormalige projek Moses Metro Man en sy solowerk. Regardt se vorige samewerkings sluit Jesse Clegg, Dominic Neill en Josh Savage in, asook The Temper Trap se Suid-Afrikaanse toer. Met SENTIMENT wil hulle ’n nuwe Afrikaanse rockgroep vestig met die energie van stadionrock, sterk melodieë en lirieke wat emosioneel tref.

“Ons wil graag ’n ‘next level’ Afrikaanse rockband met ’n stadion-rock sound wees; groot kore, met sentimentele musiek,” vertel Jako.

Die idee vir die groep broei reeds vir jare. Jako en Regardt het lank oor ’n moontlike projek gepraat en deel ’n liefde vir dieselfde soort musiek. Regardt het selfs reeds daaraan gedink terwyl hy nog in Berlyn gewoon het.

--

“Ons loopbane is nou van so ’n aard dat ons voel die tyd is reg. En om ook eerlik te wees het dit net een skryfsessie geverg,” sê Jako

Die naam SENTIMENT het ontstaan nadat hulle na die nuwe liedjies geluister het. Dit vang die emosionele aard van hul musiek vas, terwyl dit genoeg ruimte bied om hul klank later verder uit te brei.

"Ek Wil Jou Sien" gaan oor die een persoon vir wie jy enigiets sal doen om hulle weer te sien, selfs wanneer alles om jou uitmekaar val. Die liedjie is binne ongeveer 30 minute geskryf nadat Regardt met die kitaarriff vorendag gekom het en Jako spontaan die woorde “Ek wil jou sien” gesing het. SENTIMENT se tweede enkelsnit is ook reeds opgeneem en sal na verwagting teen die einde van Oktober verskyn.

SENTIMENT se debuut enkelsnit “Ek Wil Jou Sien” is nou beskikbaar op alle digitale platforms, asook op ons Spotify & Apple Music Speellyste - NUWE / ALTERNATIEF IN AFRIKAANS: Apple Music  | Spotify