Vir Moeilikheid, ook bekend as M, het sy debuutalbum begin toe hy homself beter verstaan het. Ná jare waarin hy gevoel het hy moet dele van homself wegsteek, gee H.K.G.K. daardie gedagtes en gevoelens ’n plek om hardop gehoor te word. Die album se 13 snitte beweeg tussen alternatiewe pop en rock, met liefde, verslawing, geloof en hoop as temas. M het ’n groot deel self geskryf, vervaardig en opgeneem.

Die nuwe groep Buurvrou het nog geen amptelike musiek vrygestel nie, maar hul organiese ontstaan, speelse energie en meerstemmige klank het reeds mense se aandag begin trek. Die akteur en musikant Beer Adriaanse vertel namens die groep van riffs wat soos dwelms in De Waalpark uitgeruil is, ’n soutpotjie as instrument en liedjies wat eers hul voete op die verhoog moet vind.

Die titel klink dalk na ’n lekker jolige Braaidag-liedjie, maar “Aksie braai” is eintlik iets heel anders. Francois van Coke en Hunter Kennedy beskryf hul nuwe enkelsnit as moontlik die hartseerste braailiedjie ooit.

Nadat hy vanjaar tot die finale ronde van die Ruk en Rym-kompetisie deurgedring het, maak die Melkbosstrand-liedjieskrywer en musikant Konstant Wiesner nou gereed om sy eerste enkelsnit die wêreld in te stuur. Sy klank is gebou op eerlike stories, akoestiese elemente en die op- en afdraandes van die lewe.