FRANS KAROO DUIK DIE DONKER IN MET NAGSKOF IN DIE KERKHOF

Frans Karoo / Fotograaf: André Badenhorst

Ses snitte, een eerlike reis deur vrees, herinnering en hoop. Ná die vrystelling van die enkelsnitte Phoenix en Skaduwee, is Frans Karoo se nuwe EP, Nagskof in die Kerkhof, uiteindelik hier. Die ses-snit-projek is nou op alle digitale stroomplatforms beskikbaar en neem luisteraars op 'n introspektiewe reis waar temas soos identiteit, verlies, oorlewing en menswees sentraal staan.

Hoewel die titel donker klink, lê daar veel meer agter die naam. Vir Frans simboliseer "Nagskof" die ongemak van alleen deur moeilike tye beweeg, terwyl "Kerkhof" 'n plek van rus, herinnering en toevlug verteenwoordig. Saam vorm dié twee idees die emosionele kern van die EP. Die projek open met "Die Lewe Is 'n Teef", waarna die reeds bekende "Phoenix" en "Skaduwee" volg. Die fokus val egter op "Jongman", 'n persoonlike snit wat kyk na die druk waaronder baie jong mans grootword en hoe die invloed van families, skole, geloof en sosiale verwagtinge hulle lank ná hul jeug kan bybly.

Later op die EP ondersoek "Die Blues" die swaar emosionele nalatenskap wat deur bluesmusiek geïnspireer word, voordat "Huis" die projek op 'n besonder eerlike noot afsluit. Volgens Frans was dié opname oorspronklik net as 'n gedig bedoel, maar die spontane ateljee-opname het uiteindelik só eg gevoel dat dit onveranderd behoue gebly het.

Met Nagskof in die Kerkhof wys Frans Karoo weereens waarom hy as een van Afrikaans se mees unieke storievertellers beskou word. Dis nie 'n EP wat vinnige antwoorde probeer gee nie, maar eerder een wat luisteraars uitnooi om saam deur die donker te stap en dalk iets van hulself daarin raak te sien.

Frans Karoo se EP is nou beskikbaar op alle digitale musiekplatforms, asook luister Skaduwee nou op ons NUWE / ALTERNATIEF IN AFRIKAANS Speellyste: Apple Music | Spotify