NUWE HOOFSTUK BREEK AAN VIR DIE GROEP ROOKSEIN

Rooksein, die gewilde Afrikaanse groep wat in 2018 deur drie studente-vriende van Potchefstroom gestig is, betree ’n nuwe fase in hul musikale reis. Wat as ’n vriendskap en gedeelde passie vir musiek begin het, het oor die afgelope agt jaar ontwikkel tot ’n gevestigde naam in die Suid-Afrikaanse musiekbedryf.

Rooksein / Universal Musiek Suid Afrika

Sedert hul ontstaan het Rooksein ’n merkwaardige impak gemaak. Hul musiek is gesamentlik meer as 45 miljoen keer gestroom, ’n prestasie wat getuig van hul sterk verbintenis met aanhangers regoor die land. Met optredes op van Suid-Afrika se voorste verhoë het die groep hul plek in die plaaslike musieklandskap verder bevestig. Hul energieke vertonings en kenmerkende klank het ’n lojale ondersteunersbasis opgebou wat saam met hulle gegroei het.

Soos met enige kreatiewe reis, bring groei en verandering egter nuwe rigtings mee. Dit word hiermee bevestig dat Megan nie langer deel van Rooksein sal wees nie. Hierdie besluit vorm deel van ’n natuurlike nuwe seisoen vir die lede van die groep. Elke lid is ook as solo-kunstenaar in eie reg gevestig, en hierdie volgende hoofstuk bied ruimte vir verdere individuele ontwikkeling sowel as nuwe kreatiewe moontlikhede.

Hoewel Megan se pad nou in ’n ander rigting beweeg, bly sy ’n integrale deel van Rooksein se geskiedenis. Haar bydrae tot die groep se identiteit, klank en sukses het ’n blywende indruk gelaat. Die grondslag waarop Rooksein gebou is, dra steeds die spore van daardie samewerking en gedeelde visie. Haar rol in die vorming van die groep sal altyd erken en waardeer word.

Met hierdie verandering kyk Rooksein vorentoe na ’n nuwe era. Die groep is gereed om hul musikale reis voort te sit met dieselfde passie en toewyding wat hul ondersteuners oor die jare leer ken het. Groei bring nuwe moontlikhede, en vir Rooksein beteken dit die begin van ’n vars hoofstuk, geanker in hul geskiedenis maar gerig op die toekoms.

Beste wense aan Megan en Rooksein vir hierdie nuwe seisoen. Mag hul onderskeie musikale reise voortgaan om gehore te inspireer.

Vir enige ander navrae kontak:

Leozelle Bekker: leozelle.bekker@umusic.com